التكبّر

بديت بذكر ربّي والقصيد احرص على معناه
وانا ما أقول كلمه قبل لازنها بميزاني

ليا منّي بنيت القاف اجوّد ساسه ومبناه
كلامٍ بالوفاء مثل الذهب ينطق به لساني

يقوله من تفكّر فالزمان وشاف ماقزّاه
انا ميّزت فالدنيا وصنع الناس قزّاني

انا ميّزت في بعض العرب مغترته دنياه
يجيك من التكبر والترف فسقان عمياني

كثير المال لكن العمل ماتعرفه يمناه
ليا منّه لقا المحتاج يضحك منه شمتاني

وشنهو زود هاك الوجه الا يانعنبو مجناه
صحيح انّه كما قالوا من الانسان شيطاني

يسج الرجل في درب الردى والخير مايبغاه
خبيث اعمال في درب الردى راضي وطرباني

يطيع النفس فالممشا ورى المشهاه والملهاه
ويهجر كل مايأمربه الاسلام هجراني

الا ياكم من يوم رقد والفرض ماصلاّه
حياته كلبوها مغضبه لله وعصياني

ويأكل من عروض الناس في صبحه وفي ممساه
تقول انّه على عرض البشرسقمان طوياني

يرابي فالبنوك وكل ماله سحت جوف إشواه
حشابه في نهار العرض في زوغات الاذهاني

نهارٍ تعرض الاعمال ماينفع خليل وجاه
ولاينفعك يابن آدم ياكود اعمال الاحساني

والا يابن آدم اعرف مابقى والموت لاتنساه
تذكّر يوم تقعد فاللحد وحيد وحداني

ترى يوم القيامه كل ماتفعل تبا تلقاه
واحد يلقى عمل طيّب واحد يلقى عمل ثاني

واصلّي بالصلاه الواجبه على رسول الله
محمد خير من جاب الرساله دون نقصاني