يالله لا تبلاني في بارد احساس

يالله لا تبلاني في بارد احساس
يا من وهبتني هالاحساس كله

يالله عساه يكون شهٍم ولد ناس
ويقدر اشعوري بدقه وجله

لا من نظرته نظرةٍ كلها ياس
يفهم على الطاير وراها ألف علة

ان قلت له عروق هالقلب يبّاس
يمطر غلاه وكل عرقٍ يبله

وان قلت له عطشى وأبي من الهوى كاس
من مورده يبل ريقي ويعله

وان قلت وين الكيف والشعر والناس
يفتح لي المجلس غلا ولي يفله

ولا ضاق صدري وصار بالراس عوماس
بالعشق لي يبهّر ألفين دلة

ولو حل بي ظرفٍ وهالوضع محتاس ر
يحفظ مكاني ولا يجي أحدٍ محله

أدري الكرم والطيب للرجْل نوماس
لكنّ انا شفّي الذي الحس دله!