موت الهقاوي !!

أنا ما جيت ادوّر في خطايا الوقت لي تبرير
ولا جيت اسرق انفاس المواجع .. يا معنيني

من اوطان المواجع جيت .. لي فيها بلاد .. وبير
ولي فيها سحايب .. ماتكفّ ولو تكفّيني

كريمة ماعليّ منها خلاف .. ولا عليّ تقصير
وفيّة .. لو غدر وادي الوفا تمطر .. وترويني

مجرّد عابرة وهم الامان الممتلي .. تزوير
لا جيت ارجوك تحملني .. ولا اصرخ لا تخليني

بلا موعد لقيتك في دروب الهم .. تحث السير
وانا مثلك طواني لين ملتني .. عناويني

سألت الدرب عن جرّة خطاك .. ولا عطى تفسير
وانا مابيه لا يعطي جواب .. ولا يسليني

كلام ٍ حار في فمي .. تلعثم .. خانه التصوير
مثل ماخانني حظ الردى .. لين انهدم ليني

كسر ساق الاماني .. مد يدّينه عشان يثير
زلازل ويل في صدري .. وتتفجر براكيني

أنا يا سيدي جيتك وانا سبّقت .. بالتكبير
طويت الصفحة اللي كم تحرّت .. خط تلويني

على الضّفّة من الغربة قتلت الحلم .. بالتغيير
وذكّيت الهنا قبل انتظاري له .. يذكّيني

تعبت وملّت انفاسي .. من الترحال والتهجير
وملّ الشّوك في درب المواجع .. نزف رجليني

أنا ماجيت اصبّ الهم ذنب ويطلبك .. تكفير
ولا جيت اشربك موت الهقاوي يا مقهويني

مجرّد عابرة بارحل عن عيونك بلا تبرير
بلا عذر وبلا كلمة عتاب .. وقبل تقصيني !

فمان الطهر ياغربة شعور ويا عساك بخير
محطّات الغياب تلمّ همّي .. يا معنيني