دوله سعوديه وللحكم مالك - محمد البياضي

يا مبعد الهقوات قصر حبالك
لاتحسب ان ذيك المسافه قصيره

من ليلةٍ وحده يبي يضيق بالك
وشلون تسري والمساري خطيره

لوكان معك رجال ماانت لحالك
والكل منهم ينتخي في عشيره

وابناك وابناء ابوك وابناء خوالك
وابناء عمومتك وابوك وقصيره

وحزمتهم فوق الخيول وجمالك
وامنتهم با البندقه والذخيره

ماتسلم ولا بعد تسلم عيالك
ولايسلم الليّ فوق غارب بعيره

هذي مطاياكم وهذي حوالك
وهذا سلاح اهل النفوس الحقيره

من كم سنه مقطوع عنا ارسالك
جوك عليه الحظر ماطار طيره

يوم انحشرت وفيك حطوا عقالك
مخزوم راس ومنحجز فاالحظيره

من فوق خشمك غصب سلمت مالك
لو كان فيك احساس مافيك غيره

ارخصت يالجابان صافي حلالك
وابيدك قدمته وعينك بصيره

لوكان سلمته لناس قبالك
من العرب والا قريبين ديره

ماواحدٍ منا يبي يدق جالك
وانقول ذا عرفه ولا احدٍ يشيره

يا مكثر عيوبك وما اخبث اعمالك
ماانت نظيف القلب والشكل عيره

يا معمر الليّ شسمك اضفى ظلالك
شرهتك هذه حيل شرهه كبيره

ياكبر حيلك يا مسلط رجالك
دفيتهم في جوف نارٍ سعيره

شرهتك هذه نابعه من خبالك
والراس مابه مخ حتى يديره

وين السياسه يا محقق امالك
وانا اعرف الحاكم يشاور وزيره

توقعوا شعبك يمينك شمالك
مايحسبونك سيف يآكل جفيره

لورشحون الشعب شخصٍ بدالك
يسد ماهو مثلك اعمى بصيره

شاشت براسك كيف وابعد خيالك
تصتاد صقر ٍوابن صقر ٍالجزيره

هذا ولد حر ٍتعلى جبالك
ماكره في روس الجبال العسيره

في موقع ٍمايصلونه اشكالك
ومن دونه الليّ ينطحون المغيره

دوله سعوديه وللحكم مالك
هذي سلالة حكم ماهي صغيره

والشعب والدوله سوى بليل حالك
اقلوبهم وحده ولا هي بحيره

ووالله لو حطك بنيته طالك
ياصلك ابو متعب بحاله يسيره

لو كان حولك شيدوا الحصن شالك
ولو كان من دونك حشود ٍغفيره

لكن نصيحه غط وجهك بشالك
من قبل لا تهل الدموع الغزيره

يوم انكشفت وعننا الرب زالك
لك نعتبرها الاوله والاخيره

والنصر لهل النصر والذل فالك
راسك تحت حد السيوف الشطيره

مناسبة القصيدة

هذه القصيده حول ماسمعناه من القنوات الفضائيه في مولاي خادم الحرمين الشريفين الملك /عبد الله بن عبد العزيز آل سعود حفظه الله من كل سوء وابقاه ، أثناء ما كان ولياً للعهد وعلى اثر خلاف بينه وبين الرئيس الليبي معمر القذافي .
© 2024 - موقع الشعر