عابر سبيل

لـ محمد المصعبي، ، في غير مُحدد، آخر تحديث

عابر سبيل - محمد المصعبي

أحلا صباح اللي على شطّ البحر به نلتقي
وأجلس معاك لحالنا ياساجي الطرف الكحيل

وانته تقول اشتقت لي ونا عليك مشوّقي
ياحالنا حالة (بثينه) يوم يعشقها (جميل)

إي ولعي بي مثل نار (الموبذان المشرقي)
إي ذوّبي صخر الجليد اللي على صدري ثقيل

إيه احرقي مهجة محمد ولعيها واحرقي
يامهجة محمد وشوقه ياضياها والدليل

إي ولعيني لين أجيب أحلا القوافي طرّقي
من بحرها حلو المعاني هاجسي يهوى الجزيل

نذرِ ٍ عليّه لأشبعكِ وأرويكِ شعرٍ منتقي
وأنتي اكتبيه بدفتر الذكرى مع (سيف) الايميل

ثم دوّني عنوانها (شاعر قضا عمره شقي
ما راس ماله غير طرس وبه مدوّن كل قيل)

وإن قلت أحبّك يامها لا توثقي وتصدقي
إيه اعرفيني شاعرِ ٍ ماله على الدنيا خليل

ولو حلفت إني عشقتك لي أبد لا تعشقي
أخاف أنا لو تعشقيني تسهري الليل الطويل

إيه اتركي نار النوى متوهجه في جوسقي
ماأريد قلبك من صواديف النوى يصبح عليل

المشكله مالي على الدنيا مبيت ومشرقي
لو غرّبت بي في عدن تشرق وأنا وسط الجبيل

مالي على الدنيا محل أحلّ به وأترزقي
مالي بلد ثابت أبد يابنت أنا عابر سبيل

عابر سبيل وماعرف من رحلته ماذا بقي
ولا عرف موعد رحيله أو إلى أين الرحيل

من شان ذا يابنت أنا أترجاك لي لا تعشقي
وإذا طروا لك سيرتي قولي لهم طبعه نبيل

وإذا وصل خبر موتي وقالوا مات المشتقي
ماأريد دمع إنسان بأسبابي على خده يسيل

© 2024 - موقع الشعر