لسانك حصانك

لسانك حصانك لو تصونه صونك
وإن هنته الليله فبكره يهينك

وأرزاق ناسك ماتوقف بدونك
لاتحسب أرزاق العرب في يدينك

والصاحب اللي يرتجي منك عونك
في ضيقته عينه وبكره يعينك

أقولها وإن قلت هذي شؤونك
باقول بصرك في مسيرك هوينك

ماينفعك حجمك وشكلك ولونك
الأخلاق كملها رسولك بدينك

زمان لاجوك العرب ينصحونك
بعت الجمل وأعطيتها ناصحينك

الأيام دورتها تسبب جنونك
ماترحمك لاجات لابد تشينك

لوكنت باني في الشوامخ حصونك
باتحذفك منها مع حاسدينك

مادامت لقبلك عرب يشبهونك
يومين والثالث تشوفه بعينك

ماترحمك لو تسكب الماء عيونك
باتعوز أصحابك وتذكر سنينك

لو تكره أصحابك وهم يكرهونك
بايوقفوا جنبك على طامعينك

وإن حبك الله شف عباده يبونك
وإن عافك الله غدو عايفينك

والموت شف لازم وبايدفنونك
ويبقا لهم فعلك بشينك وزينك

تبغا الجماله يامعقل ظعونك
مابا تجيك البيت وتقول وينك

اسرح لها يومك على ظهر بونك
وإسر الليالي واطلب الله عوينك

أما الفساله وأهلها بايجونك
مثل الطروش اللي يجوا ناصدينك

حذراك لاهي وأهلها يعجبونك
لا خذتها بكره يدنق جبينك

صيت الجماله ينذكر لا طرونك
وصيت الفساله بعد موتك مشينك

كسب الجماله وأنت ميت يصونك
وينمدح خالك مع والدينك

وكسب الفساله وأنت ميت يخونك
وينشتم خالك مع والدينك