تحت السدر

يالله ياوالي وياعالم الحال
ياعالي(ن) معبود ماشي فوقه

أرويتنا عقب الظما مزن وخيال
والرعد له حنه ولاحت بروقه

قفر البوادي عقبها بالمطر سال
وأنبت عشوبا(ن) راويات(ن) عروقه

العشب بأنواعه قصيرات وطوال
يازين ممشى الأرض محلا طروقه

رقيت عالي النايفه عالي جبال
حافي القدم يمشي ولاشي يعوقه

مابين ربل وشيح ياراحة البال
والسيل صافي كل وقتي أذوقه

تحت السدر يازينها فيّ وظلال
كن الثرى امن الجمال مخلوقه

الزهر والنحل وفراشات وأشكال
حتى القميري ماخذ(ن) كل حقوقه

سبحان منهو غاثنا غيث همال
والناس من عقب الظما له شفوقه

ثم الصلا وأعداد ماوادي سال
على النبي مالاح رعد وبروقه