بين الرجاء والياس

شفت الخبر موثوق ما كنّه سوى شهب الرجوم
بين السحايب والسماء دمعي نثر همّالها

أثر المصايب ماتجيك إلا كما سود الغيوم
وحنا كذا بين الرجاء والياس نرسم فالها

البارحه والبارحه صدري تولته الغموم
من ضيقتي ماعاد أميّز شرقها وشمالها

والحظ عاثر بالشقا دايم تلاويحه وسوم
مهما نحاول تنفرج لاحت قيود أغلالها

لا يا " عروس البحر" يا نورا تسامى للنجوم
أنتي جواهر نادره لا مالقيت أمثالها

تشكين .. مستشفى / ودكتور .. ومواعيد .. / وهموم
يوم الغضب يسكن عيونك والتعب يبرالها

من يسقي النظرة رضى وإحساس في لحظة وجوم..!؟
من يرسم البسمة على شفاتن قصير احبالها ؟

نوب أسلّي خاطرك بأحلى المعاني والعلوم
وأجيب لك حلو المثايل ضحكتك يحلالها

ونوب أصارع شيء مخفيته تحت بيض الهدوم
شيء أسمّيه ( الونين ) أو لحظة يرثالها

لاباس يالموجوع قلبك ياعسى طيبه يدوم
لاباس والدنيا علينا دايرات أحوالها

دنيا المواجع والعنا دنيا على الظالم رحوم
دنيا رديّه ياغلاتي ماشكرت أفعالها