رفرفات الجوى - النايفه

اهلا هلا بطلِّتك ديمه علي ممطره
وجهٍ عشقته ندى من يوم طرْد الهوى

صحّيت عشب بفيافي مهجةٍ مقفره
وفزّت حنايا الخفوق لذيب نارٍ عوى

شوقك سيوف وعيونك غِمدها مُشْهره
نظره إخْتِصَرْت بعتبها كل جفاف النوى

ودي اجيلك حطب جمرك علي تنثره
ويصير حنّا زفافي رفرفات الجوى

روحي بقايا حروف وطيفك المحبره
والوقت دونك جرس مهجور دمع ارتوى

العُمْر بعدك غصونٍ بالتعب مثمره
والحِزْن زوادتي من يوم حظي التوى

كل الشموع بْغِيابك ليلها تنكره
والجَمْر سرب اصدقا ف...الخد ساحوا سوى

ومل السهر من عيوني ثم بغاني اعذره
لكن فِضَحْتَه بِطيفك يوم شعشع ضوى

ما همني ارماااح ناسٍ مقبله مِدبره
وانت بحياتي جنوووون....ورمح جرحه دوى

ياسيدي طلِّتك ضحكة ضحى مسفره
مابي تفارق عيوني لأ00 مالك لوى

© 2024 - موقع الشعر