عقد لؤلؤ مع ألماس - مازن العوني

يااللي كلامك عقد لؤلؤ مع ألماس
طابت سنينك واسعد الله لياليك

قل ماتبي واهرج بلا حد واقياس
ياحي هرجك لالفاء قلب مغليك

إن قلت لي حساس شاعر وحساس
وإن قلت لي مغرم فأنا مغرم فيك

حبك بنيته وسط قلبي على ساس
ماتأخذه هذى ولاتأخذه ذيك

اي والله احبك ومن بد هالناس
حب الشرف لايدخل القلب تشكيك

وابادلك نفس المشاعر والإحساس
حبك وحبي والقهر في معاديك

بستاذنك حسيت بالصدر هوجاس
شعرٍ تغّنا بين حاظر وماضيك

قرّب هنا لاهب للشعر نسناس
وتشوف كيف حروف الابيات تغليك

انثر شعور الشعر حبرٍ بقرطاس
والا الغلا ماهو حشا بمتعديك

يااغلا من الغالي وياعذب الانفاس
يااحلا من الحالي عسى الله يخليك

ياأطيب من الطّيب لك الطيب نبراس
يااطهر من الطاهر لك الحب وإليك

لايقربك ياطاهر العرض وسواس
ريّح ضميرك واقطف الحب بيديك

انت البحر وانا مع البحْر غطّاس
وانت السماء والحر يكفخ حواليك

وانت الرجاء لاقرّبت لوعة اليأس
وانت الامل يوم الآماني تناديك

وانت الحياه وطنخة الفكر والرأس
اقول: والله ماش شخصٍ يساويك

بس ارجهن ياعقد لؤلؤ مع ألماس
دامك شريك الروح وشلون اخليك؟

© 2024 - موقع الشعر