العالم اللي سوالفها على الدجّه!!

خلوني اسْج في حالي ومع حالي
ماوالله ارتاح لين اسج هاالسجّه

آسج لي سجةً تبري غثاء بالي
لاجاتني صرت مدري وين متوجّه

بس المهم ابتعد عن شر غربالي
والعالم اللي سوالفها على الدجّه

ناس تجيب الهموم وتنبش السالي
اعلومهم عن طريق الحق معوجّه

تضحك بوجهً بشوش وقلب محتالي
على النمايم وحش الناس ملتجّه

البعد عنهم هنآي وقمة آمالي
لوكان ممشاي مع دربٍ خلاً فجّه

ارتاح وانثر همومي في خلاً خالي
واعلْم الدرب كيف اقدامي اتسْجّه

واعْلم الكيف لاسوّيت فنجالي
اضلوع صدري على طاريه منفجّه

واعلْم الليل لاغنّيت موالي
بإن الهواجيس وسط الخافق اتخجّه

واعلْم الغيَم مايحْصل ويجَرالي
احلام عمري سحايبها غدْت عجّه

مابين حلمٍ قديم وحلمي التالي
ماعاد ياحلمي الوردي بقا حجّه

ضاقت مساحات دربي والآمل طالي
يارب صدري من هموم الزمن نَجّه

نّور ضميري بذكرك وانت ملجا لي
ذكرك هْدوّي ليا حسيت بالضجّه

وعطني على نيتي في وجه عذالي
اللي على غيبتي تلقا لهم لجّه

ماهو بهمي وانا ماشي على فالي
مقصودي الطيب لو سجّيت لي سجّه