من يشرب الدّخان لا ضاق عمّر - ماجد الزيد الخالدي

من يشرب الدخان لا ضاق عمّر
ونا ليا ضاقت اعمّر دواوين

سهران لين الليل للنور شمّر
قريص بعروقة يحسّ السكاكين

يامل قلبن من بلاويه جمّر
واكنّ دخانه عن الناس ياحسين

خوفي خبيث يقول / قلبه تدمّر
ولاّ يحسون الوجع بي غالين

تشوفني اضحك .وكبدي تسمّر
الله ولا يفرح بهمي شياطين

نمرن وَصَارع لي زمان ٍ تنمّر
يركي على الطيب وخلا خبيثين

الله من همِّ بصدري تخمّر
طنيان واخشى فوعة ٍ تجلب سنين

جال ٍ على كتوفي وقام يْتهمّر
ماتعبت في حمله / ولي ربِّ مْعين

يا راكب ٍ من فوق ذاك المضمّر
مثل العملّس يوم يقفي عن العين

وصّل كتاب الخالدي لحرّ شمّر
سلمان سلمان ٍ من العوق والبين

قل له طمرناها وهي ما تطمّر
تكرم بلاد لعين ناس ٍ وفيين

وإلا لو الجبري عيونه تحمّر
يسطر بكف القاف وجه الملاعين

يا صاحبي لا شفت قافي تقمّر
بذرت فيه رماح تسقى دمامين

علم ٍ يبان وعلم واجب يغمّر
سياسة الأحرار بين المساجين

كم واحد مْن الحال قام يْتذمّر
لا الحقّ فاز ولا اقعد الصّوت نيمين

المجتمع غنّى لأليسا وزمّر
يلعن ابوها ضيّعت جيل الالفين

القدس يهدم والكنيس يْتعمّر
وحكّامنا تعطي مقاولهم الطّين

ما شفت حسني كيف قام يْتئمّر
القاهرة صارت عفن من ابو حصين

ولا اردى من المربوط , إلا معمّر
ثوري حكي / بالله يضحك على مين ؟

افلق جبيني إن شفت فيهم مثمّر
يا خي بطولتهم سوالف بزارين

تدري من الأبطال ؟ فجّر ودمّر
حتّى ولوهم ثلّة اغراب يا حسين

من يشرب الدّخان لا ضاق عمّر
ونا ليا ضاقت خبصت القوانين

© 2024 - موقع الشعر