ذيل الكلب دايم حني - رنيم الفارسي

ملِّني دفتر قِصيدي والحبر يغْتاآآبني
والشّعُور اللي بجوفي ما لقى حوله وليفه

يا زمن بِنْسى الأسَى .. تِكفى طلبتك نسّني
ما بقى فيني حياتن إلا زفْراتن هفيفه

كلّ ما قلت الحزن ولّى رجع لي وضمّني
والتصق فيني شهوورن .. يا ثِقل دمّه وِكِيفه

آآآهِ كلّي ينتظر مخْرج لأَمْسن هزّني
كلّ مابهْ مختلفْ .. حتى الشِّتا شمْسه مَصِيفه

الحقَارة مُوضِة(ن) يكْشخ بها كل مغتني
والصّداقة وانْ علتْ ..كذبه بمجملها سخيفه

غلْطتي يمكن شراتي للي يُومن صدّني
\ ولا تصديقي لوهمن حدّه أطباعِن سفيفه

بسألكْ .. تذكر سواتي يومِ غدرك طالني ؟
والعذِرْ مني اوصلكْ رغمِ طعناتن عنيفه

واشتريتك رغم إنّك في رخيصن بعتني
ما هقيت انّك حثاله ( عنّك الفرقى .. حليفه )

ما كذب منهو حكى (ذيل الكَلِبْ دايم حني)
والسّفيه إن ما تربى دايم أطباعه كسيفه

سِب وقول اللي تقوله، منطِقك ماهمني
ما يصّغرني كلامِك دامِِ أطباعي عفيفه

والغلا سيبه لأهله وارحمه خَلْ يغتني
مثلك اللي شوّهه .. وأبْقى نظْراته كفيفه

واعدك جاييك يومن تنفضح دامك دني
ربّك اللي في السما حقّن نصيفه

وآخري ببعد عن اللي بالنّذاله رزّني :)
حتى لو كل المودة شاريه قربه بعيفه

يشهد الله لو وريدي حزّني أوْ ذلّني
بقطَعهْ وأمحي وجوده - لوبيقتلني نزيفه

© 2024 - موقع الشعر