ورى نجد

انا والله اني مونس الجرح مير اكماه
اكذب جروح داخل الصدر مخطوره

ماودي على جرحي يجر العذول ارياه
يبادر برايه لو محدن طلب شوره

اجالدواشد احزام صبري واكض الاه
واجامل ولو النفس ماهيب مسروره

الى ضاق صدري قمت من مرقدي اجفاه
وهجعة خلي البال للعين منكوره

غدى كوعي الايسر لخدي كما المركاه
اعدل وبدل واللعن ابليس وشروره

سبب واحد اركى على قلبي العرقاه
بيمناه رص القلب وسمه ودستوره

انا لو ادور فالعرب ما وجد حلياه
مكمل وبه كل التواصيف مذكوره

وله ضحكة فيها الخجل لا ابتسم بشفاه
يهز القلوب اللي على الزين مجبوره

وله هيبة تملا السما قدم منهو جاه
يلاقي له ارقاب الرجاجيل مكسوره

والا من مشى كنه بمشيه يحسب اخطاه
مثل عنز ريم فالمشاعيب مذعوره

والى من تثمني عود موز وقف واوماه
مراويح غربي على الخد ماموره

هذا غاية القلب و نهاية بلاه وداه
فلاشك يديني عن الزين مقصوره

بعيد عن عيوني بيوت الغضي عزاه
على حد علمي به ورى نجد مذكوره

اعيش الثواني والدقايق على ذكراه
وانا اقول معذوره ولا هيب معذوره

مهو حق يتركني لليل يهول اقصاه
وانا ودي ان حالي مع الناس مستوره

مير اني اجمل واتحمل عظم بلواه
ولو نشدوني عنه قلت انتهى دوره

وانا مونس جرحه بكبدي لاشك اكماه
اكذب جروح داخل الصدر مخطوره