يا خالد الفيصل

يا خالدْ الفيصلْ وش هي المعاناة
إلا احْتضارن للدروب الهنيّه

كل العنا ذقته وعندي الإجابات
واسْمعْ بعد مني أمورن خفيه

هي بالمقدر عند ربّ البريات
لا من صمييم الذات ولاهي أجنبية

هي موطنن حدّه دموعن وآهات
صبْحَه همومن والمسايا شقيّة

أو طعنتن خانت بأمسِ المودّات
أوْ غيمتن باتت لشوكن سقيّة

هي ليلتن تمْطِر خطايا وزلّات
أوْ واحتن تَثْمِر خِصالن دنيّة

أوْ منهجن سارَت بشرْعهْ ديانات
حُزنه تعبّد والسّعادة عصيّة

هي حسرة تسكن بكل النهايات
تفني وتجرح في قلوبن بليّه

أو يائسن يصرخ على جمع الأموات
( مني خذوني وادفنوني هنيّه )

حتّى الصّبر لو هو يجينا برايات
تنكّست تنعي صروفن قويّة

ولو بيومن عانقتنا مسرّات
ذابت بلحظة في ضلوعن طريّة

هاذي تعاريفي لهمي وما فات
كلي ضحيّن والأمل بي ضحيّة

أبْكي ولا فاد النّدم عقْبِ ما فاتِ
واصرخ ولا في من بيسمعْ دويّه

يا خالد الفيصل هذاهي المعاناة
كلها أنا والله وأكثر شويه

وهاذي أنا جِسمن مليّن بالآفات
من يقتله .. والله حليفه ( جزيّه )

.قلم
رنيم الفارسي