(فلانه) خذي علم اصدق احبابك الغالين
كلام الحقيقه دون زود ونقصاني
ياليتك بما في القلب لك من الغلا تدرين
على شان يبقا حبنا العذب بأماني
وانا من غلاك اوصيك من هرجة الواشين
ترى كل شخص له حبايب وعدواني
مكانتك عندي رغم ان عمرها عامين
تعدت مكانة روحي ونور الاعياني
احبك بحب في تفاقم الى ذالحين
يزيد ويزيد الشوق يوم ورى الثاني
اذا اشتقت لك يشتب في خافقي نارين
ولاغير شوفك يطفي اشعال نيراني
يسيطرعلى فكري وقلبي وشوف العين
واذا النوم سلطان ترى الشوق سلطاني
ولايختلف في صدق حبي كلام اثنين
ولا له سبايب وانما حب رباني
جمالك بعيني حط زين الخلايق شين
مجرد ما اشوف الزين واتذكرك شاني
انا استغفر الله ذالبها ماخلق من طين
بريقك بريق الماس ما كنك انساني
حرام انك اجمل شخص يجمع شموخ وزين
وحرام انك اجمل شخص اغليه وأغلاني
وحرام انك اجمل شخص يمشي بجوالين
الاول على شانه والاخر على شاني
وحرام انك اجمل شخص ينطق بحرف السين
تجيبه بشكل تنسحر فيه الآذاني
وحرام انك ارقى شخص في العالم الراقين
وحرام انك اول شخص بالحب عناني
مزاياك لو بأعدها وصلت الألفين
بتطلع علينا الشمس وتغيب ما امداني
ابطلب طلب واقول بعدالطلب تكفين
ولا اضن مثلك لو طلبته بيجفاني
ابي ما يدوم فراقنا من بعض يومين
حدانا يسوي خير ويكلم الثاني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر