حلم الاماني

ليت الغلا من بيننا خافين دوم
ولايعرفه بالناس قاصي وداني

ارسل لك ابياتي على حزة النوم
وترسل لي اعجابك بكل المعاني

واشكي لك همومي وتشكي من هموم
واصبر عشانك يوم تصبر عشاني

ويصير حبك داخل القلب مقسوم
متوزع(ن) من بين كل المحاني

ويكون جاشك بحر(ن) وفيه انا اعوم
في هاجسك مااغيب لو هي ثواني

واليا تواعدنا بليل(ن) به نجوم
مايشبهك الا سهيل اليماني

واشيد في روج(ن) على الفم مرسوم
وتقول خلقه ربي اللي عطاني

وتنظرني بعينك وترمي لي سهوم
واصرخ فديت اللي بعينه رماني

لاتنصدم مني ولا تبدي اللوم
هذي ترى ياصاحبي كود اماني

يمكن مع الايام لي حظ(ن) يقوم
وتضحك لي الدنيا .. ويضحك زماني

اقولها وانا من الوقت مضيوم
الله يجازي وقتي اللي ضماني

لاصرت من عشق الغنادير محروم
احسن اعيش (الحلم) لو فيه اعاني