أجــمــل عــطــايــا الله - محمد الصواغ

أيام عمري كلها اشواق بأشواق
من يوم ما شفتك وانا ممتلي شوق

أحس في حبك تمركز بالأعماق
وياليتني من سكرة الحب ما افوق

شفني , وحس الشوق , واقرا بالأوراق
فتحت لك باب ٍ عن الغير مغلوق

قصيدي بغيرك غزل كنه فراق !
أحس لا له طعم لا روح لا ذوق

يا اجمل عطايا الله وخيرات الأرزاق
غلاك كانه مانزل , يصعد لفوق

اسلوبك وزينك وطيبك والاخلاق
يسوق مجنونك على عالمك سوق

وإن كان قالوا الحب للقلب سراق ؟
عمرك سمعت بحب سارق ومسروق ؟

(أحبك) إمن الراس لي آخر الساق
ودنياي تمطر خير وغيوم وبروق

واكبر دليل إن خاطري بيوم لا ضاق
لاشفت زولك ينجلي الهم ويروق

عشاق يا أجمل دنيتي إيه عشاق
ماهمني لا هرج عاذل ومطفوق

ترا الزعل في وجهك الغر , مالاق
كنك لبسمات المخاليق مخلوق

من يوم شفتك يالغلا كلي أشواق
ولا تلومني لا جيتلك ممتلي شوق

© 2024 - موقع الشعر