مـــغـــز إبـــره - محمد الصواغ

مشتاقلك والغلا قرب يضيعني
والخاطر اللي صبر , مل وقضا صبره

بعلمك شي وافهم دام تسمعني
من واقع التجربه والوقت والخبره

( لو الخلايق على حبك تنازعني ؟
يبطون ماحركوا فيني مغز إبره )

ماغيرك احد ٍ قوا قلبي وولعني
وغلاك عندي بوسط القلب ياكبره

جيتك مشتت فكر ودي تجمعني
متضايق إمن البعاد وشوفلي دبره

لو بتكلم غزير الشوق قاطعني
مكسور والخاطر المكسور وش جبره ؟

يخونني الوقت والغيبه تصارعني
اكتب وحتى القلم خان ونشف حبره !

رجعتلك (والغلا والشوق) رجعني
ياحيّ هالشوف و الظحكه و هالنبره

غيرك من الناس لو حاول يطالعني
أصد عنه ولا اشوفه ولا اعتبره

إلا انت , يالشاري اللي منت بايعني
نظرة عيونك صفا لو ليلتي غبره

وإن كان ودك لدرب الحب تدفعني ؟
القلب يعشقك مايحتاج تختبره

وأكبر دليل \\ الخلايق لو تنازعني
بالحب ماحركوا فيني مغز إبره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر