مجرد كوابيس

ليلي سكن ما فيه غير الهواجيس
و افكار اقلبها و اتابع صداها

احيان اقول انها مجرد كوابيس
اليا لحقها النور تنزح وراها

واحيان تبدي لي عليها وساويس
واخاف لا من وصّلت منتهاها

عندي خبر فيها تضيع المقاييس
يبلش بها ملاكها واوكلاها

واليا غدت بين الوجيه المناحيس
شف عاد منهو باعها واشتراها

لاصار في بعض الدعاوي مقابيس
وتبرت المرضع ما تبغى ضناها

يوم ارتضت لمشور السو وابليس
وش شربنا من بعد ماحيس ماها؟؟

حنا نشوف يدين سراقة الكيس
ونقول يامرضي النفوس بهواها

وش حيلتك قدام ضرب النواقيس
لا ولعت دارت عليكم هواها

الحق واضح ما على الحق تلبيس
مثل النجوم اللي تنور سماها

فإلى متى ياهل الحكي والتماليس
وانتم سوالفكم تدور برحاها

اما نهضتوا ما كسبتوا نواميس
لابد من ساعه عظيم بلاها

تسوقكم سوق الركاب العراميس
اللي على المسري تطول خطاها

صكات بقعا لو تجيكم اماريس
ان روّحت وحده فالاخرى بسراها

بالله وين الراي والميز والقيس
ونشوف صالحها وندفع غثاها

حتى نقيم البيت من فوق تاسيس
ونفوت الفرصه على من نواها