ياقرة الثنتين

ياقرة الثنتين يانورها البادي
وش حيلتي كان الظروف اخلفت ظني

دونك حداني ياسعد ناظري حادي
والا عليك القلب يقرع كما الشني

شوفتك عندي يالغضي ثالث اعيادي
وافرح ليا جابك لي الطاري واغني

اي والله انك مصدر افراحي واسعادي
ولغيبتك ياشوق عرق الغلا حني

عليك قلبي دوم في حرب وجهادي
يغار من نفح الهوى ياخذك مني

ياكثر ماسرح فيك ياغاية مرادي
ويمك بعيدات الهواجيس ودني

نافذتك عيوني تنبيك بفوادي
تعال واقرى قصة الحب وتهني

النور ميلاد الضحى وانت ميلادي
احييتني وانا مع الناس متعني

غمرتني بامال واحلام وامجادي
وحبك بنى لي قصر الاشواق وامني

لاتحسبن غيابكم يالغضي عادي
الوقت لا مر دون شوفك يجنني

ودي على شوفتك يا نجمي البادي
لكن شينات الظروف اخلفت ظني