يامن تفرج الهم - فواز البليبص البذالي

يالله يامن تفرج الهم والضيق
ياللي شرحت صدورنا بالصياما

يامّيسر الطيب دروب التوافيق
تفرج لعين ٍ تسهر ولا تناما

اقوم اروح ياعشيري على الريق
من جف ريقي ما اقول الكلاما

امشي وادور بألاراضي مرازيق
الله رزق راع الابل و الغناما

ياسارق الاموال من غير تحقيق
تدس راسك مثل راس النعاما

الشي واضح مايبي له تداقيق
تاكل من فلوس الاهل و اليتاما

سلام يااهل الوجيه المطاليق
اللي توفي حقها بالتماما

تعطي حقوق الناس من دون تفريق
حلالها ماغش فية الحراما

عيونها ترتاح دايم مغاليق
والقلب ابيض مالفاه الكتاما

وانادخلت السوق من دون تضييق
ادخل اسوم ولا ازود السواما

وكل ٍ على قدة يسوم البواريق
والناس انواع ٍ وفيها غشاما

ياشعر غرق تالي القول تغريق
ماكل من يسبح يعرف العواما

واللي يحب احد يجي فيه تشويق
يفرض علية الحب شوق الغراما

واللي نطق بالقول و الحرف تنطيق
لابد مايخطي بقول الكلاما

وما كل من سار الطرق يصعد طويق
ولا كل درب ٍ يقطعة بالسلاما

الا انت يا مطبق على القلب تطبيق
ياجارح ٍ قلبي برمح الحساما

احن لك حن الحرار الشواهيق
على مواكرها تعيد الحواما

مثل الخلوج اللي يديها مواثيق
اللي ضناها يموت في كل عاما

ولا كما اللي فاقد عن الوعي ويفيق
واليا تذكر كل ذكرة وهاما

كافي دموعك يالعيون المغاريق
تهل دمعك مثل وبل الغماما

© 2024 - موقع الشعر