اسحب كلامك - محسن الحمري

لو كل غايب عن عيوني نسيته
والله لعيش العمر انسان معزول

لا تفتكر (رقمك) سهيت ومحيته
وقل اتصالي عنك لاهي ومشغول

انته حياتي وانته اللي هويته
وانته بقلبي مرتبط بي وموصول

انته حبيبي وانته اللي بغيته
والظفر ما يطلع من اللحم ويزول

دايم اوضح واشرح اللي شكيته
باللطف والرقه وكل قول معسول

لو اقدر اطوي الدرب والله طويته
مير الظروف تحول وتحول وتحول

مادام قولك بالعتاب ابتديته
الله يسامح..ظرف ع البعد مسئول

ادري تحبني بس..شاللي جنيته
مزيون..لكن عندك(السان هالطوول)

تسوي من الا شي شيً لقيته
كنك تّدور غلطتي قبل لا قول

ترضى حبيبي تهدم اللي بنيته؟
ترضى تعيش بعالمي شخص مجهول؟

ما كل صعبٍ لجل عينك رقيته؟
واللي طلبته صار بيديك مذلول؟

شاللي طلبته؟.. ايش؟..وانا نهيته
شاللي طلبت وقلت لك غير معقول؟

مقدر اسامح كل شيٍ نويته
والعذر في هذا الخطا غير مقبول

والبعد عنك ما اذكر اني طريته
حتى بعز النوم شفتك يا(مهبول)!

دام الفكر وياك وانته خذيته
وانته في قلبي دايم تصول وتجول

اسحب كلامك طاوع اللي عصيته
لا تترك الاوهام من حبنا تنول

ابيك تذكر شي واحد نسيته
انك في بالي يا حبيبي على طول

© 2024 - موقع الشعر