مساء الخير - محسن الحمري

مساء الخير,, لكن وين هذا الخير من دونك
مساء الخير,, بنطقها مجرد عاده وروتين

بعد ما غاب نورك يالغلا ثم غابت إلحونك
غدا يومي عتيم وحالتي حاله من الثنتين

جنونٍ صابني منّك او انّي صرت مجنونك
على كل حال مجنونك..على خشمي..ومن هالعين

وحشتيني إلى مالا نهايه... واسألي اشجونك
تجاوبك الشجون اني القتيل وبعدك السكين

وحشتيني كثر ما خافقي ينبض ولا يخونك
وحشتيني كثر ما توعديني دون ما توفين

وتدري وش وحشني صدق غير الصوت وعيونك
برستيج الصباح اللي ليا منك تجي آهلين

توديني ب/ اهلينك واجي راجع ب/ وشلونك؟
أنا راضي وعاجبني غلاك ورقتك واللين

ولا زاد الدلع والغنج اناديلك على هونك
على هونك ذبحتيني / ذبحتيني و ما تدرين

على بالي دلالك لا ارادي...لعنبو نونك!
طلع زيف وخداع وغش لا يسمن ولا تغنين

وياما بحب دلعتك وناجيت الله يصونك
عساه يبان بعيونك ولا بيّن ولا بيبين

عذابي يا بعد عمري غدا فنٍ من فنونك
فزيديني عذاب ولا تحاتي ..تسلم اليدين

الا.. واشلون تنسين الغرام بغمضت جفونك
ولا كنك تمرجحتي بقلبي وبدلع تمشين

نسيتي يوم يدّيني بكل خفّه.. يلفونك
وتقطف من بساتينك زهور ونرجس ونسرين

نسيتي كيف أضم الليل لا تناثر على متونك
ويتناثر وأنا ألمه ويتناثر على الجنبين

نسيتي شكثر كنتي تنتخين.. وأقول يا عونك
نسيتي اشكثر تترجي تخافين الوداع يحين

تظنين الخطا مني ودوم اكّذب ظنونك
وبالأخر تركتيني أواسي قلبي المسكين

انا اللي جيت لك صدفه وصدفه صرت مفتونك
وعزيتك ورزيتك وانتي شغلتك تنسين

نسيت ان الزمن غدار..فيه اللي يغّرونك
نسيت انك مزاجيه وطفله في الهوى تلهين

نسيت وعشت بأحلامي زعيم اللي يحبونك
نسيت وعشت مطمن بلا شك وبلا تخمين

غفيت ولا صحيت إلا على وناتي وطعونك
وتهت بعالمٍ ثاني أشوف الزين فيهم شين

رحلتي دون ما اعرف وجهتك او وين هو كونك
ولكني عرفت انك بقلبي باقيه للحين

رحلتي..قبل ما ودع ثمر تينك وزيتونك
ولا حتى تركتي لي بقايا من بقايا التين

رحلتي..والثمر يانع وتتثاقل به غصونك
ولا كني انا اللي زارعه ومربّيه عامين

انا لا جيت بتناسى عروقي شلون ينسونك
وحبك صال برجائي سنين وجال بيا سنين

انا ما عاد يغريني الصباح اليا ظهر دونك
ولا عادت عصافيره تغرد بين حين وحين

غدا هالصبح شاحب حيل دام انه فقد لونك
لبس ثوب الحداد وسالت الدمعه على الخدين

انا كلي يقين اني تركت اشيا يذكْرونك
تركت اثار في قلبك بتبقى بك ليوم الدين

تركت خصال ما تنسى ولا توجد بمضمونك
وفائي/ طيبتي/ جودي/ ومثلي صعبه تلاقين

انا من حررك مره ..قتل طاغوت فرعونك
وحرر كل ارجائك نوارس في شهر تشرين

ومهما غبتي عن عيني محال اموت من دونك
انا والله متأكد رجوعك خاضعه تبكين

ولين تحين هالحظه فخليني مع طعونك
ارتب بعض كلماتي بلا اهلاً ولا سهلين!!

© 2024 - موقع الشعر