مساء الخير - خلف المشعان

مساء الخير هالمره بلاش آسف على التأخير
مدام الرد بعيونك دموع فكل تأخيره

ثقل دم العذر ، والا كسح وجه الخطا تبرير
مدامك عارفه طبعي . أجل وشوله الحيره

ترى ماجيت لجل اسمع سواليفك عن التقصير
أعرف ان الخطا مني (بلاش نعيد هالسيره)

انا وانتي بهالدنيا تحملنا بعضنا كثير
تعوّدتي على عنادي ، وصرت آحب هالغيره

انا وانتي حكايتنا مثل : صدر السما والطير
كثير اللي يطالعها ،، ولحدٍ طالها غيره

انا وانتي حكايتنا .. مثل لعبه ، وطفل صغير
مع انه دوم يهملها رفض يسمحبها لغيره

انا وانتي .. وشاوصفلك ؟ عجز عن وصفنا تعبير!
مثل ! مدري ! مثل وشو ! ولكن صعب تصويره

انا وانتي بلاش انتي أنا لو بفقدك شيصير
ومجرد طاري الفرقا علي ياصعب تأثيره

أحبك ؟ ايه أحبك .. ذي بعد يبغالها تفكير
يخلف الله على عقلٍ ملكتي كل تفكيره

تعالي .. نحترم ( شيبة غلانا ) .. لعنبو التصوير!!
تعالي نغتنم فرصة لقانا دامها قصييره

ومساء اللي تبي ، حاضر ولاتزعل ( صباح الخير )
أنا كل يوم بتأخر .. اذا في دمعتك خيره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر