كذا كلامك - محمد المسيفري

كذا كلامك يصبح كبير وهناك
تصغر كذا في عين منهو حبيبك

لو .. ما لليالي جابتك لا تحراك
وأعلن عبوسي للزمن لين أجيبك

أنا أتمنى الموت لو ما تمناك
أنا مرضك بيوم وأنا طبيبك

تدري أحبك حب و أهواك وأهواك
ليه أتحدى شخص ما هو قريبك

لله درك ما تخيلت فرقاك
أن طال بعدك رجعك زود طيبك

والله لولا حب شخصك ولولاك
إن الهوى اللي صابني ما يصيبك

تجي وأروح أو لا تجي وأتعداك
يصير شكك ريب والشك ريبك

و لاخذتني في قد عقلي ابلقاك
مجنون من كثر الهجر شق جيبك

أقراك واكتبني وأنا أكتبك وأقراك
عيبك صحيح ولكن الصح عيبك

متى تصير إنسان وتمد يمناك
تصبح نصيب القلب وأصبح نصيبك

كان التحدي بانتظارك ورجواك
أنا انتظر لعل ربي يجيبك

الحب يعني شي من فوق الإدراك
لو طب صدرك ما عوى غير ذيبك

أنساك ..أنسى ..أنسى ..أنسى أبنساك
انته حبيبي و أنت منهو حبيبك

© 2024 - موقع الشعر