لعبه قديمه - محسن الحمري

لا تطلب الرجعة تراك انت غلطان
أهملتني..كني ثيابٍ قديمه!!

أهملتني وأشعلت بالجوف نيران
ما كن لي عندك معزه وقيمه

أبات ليلي بالبكا..وأنت فرحان
ليتك تشوف اشلون كني يتيمه

ابكي ودمعي فوق (هالخد) هتان
ليتك تجي تمسح دموعٍ أليمه

كنت اتحرى جيتك دوم يافلان
كنت انتظر منك مشاعر حميمه

كنت انتظر منك (مولع) و(ولهان)
لو قلتها تشفي الجروح السقيمه

اليوم قلبي صار(مجنون حرمان)!!
يعشق بعادك والحياة الكريمه

اشرب من اللي ذقته ازمان و ازمان
والبعد والهجران ماهي جريمه

لو جيتني ندمان..ندمان..ندمان
ما اتقبل اعذارك ولو هي سليمه

خذها نصيحه يا اول العشق..مجان
الحب مثل (اللعب) فوز وهزيمه

شيٍ فقدته بعد فرقاه له شان!!
يكفي قتلت إحساس بنتٍ حليمه

لا تطلب الرجعه..تراك انت غلطان
الحب عندي صار(لعبه قديمه)

© 2024 - موقع الشعر