حظي محطه..!!

واقلبي اللي حداه الضيم للزمهرير..
من دنيتن ماجهلنا كود تفسيرها..
 
 
تعطي خطاة الغني...ولا خطاة الفقير..
تلهيه بالهم.. والضيق.. ومشاويرها..
 
 
وأنا فقير ٍ ولالي عن همومي مطير..
أزريت أميز عطاياها وتدويرها..
 
 
أن جبتها من يمين الوضع جدا خطير..
وأن جبتها من يسار يزيد تعكيرها..
 
 
وإليا نويته برأس ٍ للمطاحن شهير..
أستهدي الله وأعقل النفس عن سيرها..
 
 
مالي يدين ٍ قصار ولا لسان ٍ قصير..
وأعرف مداخيلها وأعرف مظاهيرها..
 
 
ولاني مهرج ولاخايب فعول وضمير..
ولاأضحك الناس لأجل أنال تقديرها..
 
 
إليا وقفت أنبري للفعل مثل الشطير..
مضاربه بالنحور يبين تأثيرها..
 
 
وإليا قعدت أرتكي للحمل مثل البعير..
وأذني لحكي البشر بالسوء ماأديرها..
 
 
لكن حياء النفس يدفعها وراء للأخير..
وتبرك حظوظي ويطلع باللزز غيرها..
 
 
لاشك حظي محطه والقدر خط سير..
أما ركب شرها ولا ركب خيرها..
 
 
وراضي بقسمة ولي العرش ماني خشير..
يوم أن بعض البشر تكثر مخاشيرها..
 
 
ومالي بشي ٍ لغيري لو يقولون غير..
قناعتي وكر يربطني وأنا طيرها..
 
 
ياكثر ماألد عيني للسماء وأستخير..
لاتمتمت نفسي الولهى معاذيرها..
 
 
يالله عسى صدتي خيره وبالأمر خير..
تموت نفسي ولا أشرب مر تحقيرها..