الليل والغربه وأوطاني نجوم
ما كنّ ليلك يا نجومي سرمدي !!
مر السهر حزني ولحّفني هموم
صافحْت حزني .. ثم بكاني مرقدي
ضيّفت حزني يوم انا عيني غيوم
في صدرها .. لين امطرت فيه بْردي
امسيت لعبه .. كل من حولي يسوم
ذا حاضري وشلون يصبح بي غدي ؟!
الحظ خلاني وروّح للرخوم
وش حيلتي لا صار لي حظ ٍ ردي
غربه .. وانا لي حظ طايح ما يقوم
غنّت كفوفي حسرتي .. وش في يدي ؟
يا عزّتي وش ذلّ قلبي عند قوم ؟!
قالت : طبيبك هو عدوّك يا بْعدي !!
اللي يعالجني ولا يعرف سلوم
ما هو لعيني يالطبيب المعتدي !!
كثر السهر وان نمت يا كثر الحلوم
وان شفت خلّي قلت وينك سيّدي ؟!
يا سيّدي ما شفت منّك لي علوم
ما يصدق بْلقياك حتى موعدي
ما كنت احَسْب اني ابتركْك امهزوم
حتى ظمى عرقي وانا ابْكي موردي
كنت احْسب انك دوم عندي .. دوم دوم
لين انطفت ضوّي وهاجر موقدي
يا سيّدي .. قدرك رفيع ٍ وامحشوم
من يوم احبّك .. يوم يبدا مولدي
يا كثر هوجاس ٍ بفكري لك يحوم
يا كثر حبك يا وليفي واسْهدي
حنّيت لك .. واكثرت ترديد : امْحروم
محروم عشق القلب دوم آردّدي
واكتب حروف اسمك بخطّي كل يوم
قومك ( فلاني ) وانت سيفك خالدي !
اصحى من عْيونك واقابل فال شوم
وآخذ علاجي وانت كلّك مقصدي
وآطيح كلّي عند تكسير العزوم
وآقول للنفس الذليله : إسجدي
وان ثار بركاني على كل السموم
قلت لبراكيني : دخيلك إهجدي
يا سيّدي .. في غربتي كنت امحكوم
وش حيلتي في غربتي يا سيّدي ؟!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر