اوصيك يانواف في كل حزه - لافي النفجان

اوصيك يانواف في كل حزه
حيثك حفيد الشايب اللي به اعتز

ابوي كان ان العديم استفزه
يعطيه رمح ٍ فيه سم ٍ مركز

عليك بالتقوى تراها معزه
ياللي تريد العز هي منبر العز

وارفع مقامك يالاصيل المنزه
واختر من الاصحاب قرم ٍ امميز

لاترافق اللي كل ريح ٍ تهزه
وبأهل الشرف رحب ليا جولك وفز

والصمت به حكمه وللهرج مزه
وانذرك للخط ااحمر لاتجاوز

وليا نقص عزم الجواد بملزه
ماينفعه لاخلص الوقت لو لز

وراع الحسد حطه على نار قزه
ليا ما على الهادي حبوبه تناقز

وإن شفت بعض القوم مافيه فزه
وفي مجلسه تلقى السواقط تغامز

شوف الكواكب بالسماء مبرهزه
اطلع عسى نجمك على العال يبرز

وخل التوابع بالرخم مستلزه
والحر ماياقع مع البوم والوز

ومن طاع نفسه للمعاصي تكزه
عنه ابتعد في كل حال وتحرز

جنب وتكفي نظرة ٍ مشمئزه
مايشرب الصاحي بحوض المنحز

والسر دونه حط للقفل رزه
ويكفيك من مبدا العناوين موجز

ووقتك على دينك ودنياك جزه
ولك العمل في كل ديوان يحفز

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر