غار ابا اوصيك يامنصور تاقف محلي - سليمان بن بلال

موترٍ في بعض الايام مايشتغلي
أن مدحته صعيبه ون شتمته صعيبه

أن صفا وارد الالمان مشيه يسلي
ون تعطل فلاني قايلٍ ويش أبيبه

لو جرحني عطاله به بعد صالحلي
التجارب فوايد والمغره مصيبه

ياهل المعرفه يفطن لها من فطنلي
راعي النايده ماهوب راع القريبه

ودي ألفت نضركم عن سريع التخلي
أحكي قصته ولا بلاشً نحكيبه

المهم أحذرو يحصل لكم ماحصللي
من يميز خويه قبل مايبتليبه

الرجال أسمهم واحد وكلن هو اللي
فالرخاء غير فالشدات أمور غريبه

المشاوير ماتبغى الخوي العذلي
ماتبا الا صحيب(ن) مايعاند صحيبه

المراجل لها يصحا قبل ماتزلي
والكرم عادة(ن) له والسوالف عجيبه

والمغازي تبا اللي لاغزى مايذلي
والمواقف لها رجال حكمه وهيبه

والمسايير ماتبغى البخيل المولي
ماتبا ألا الرجال أهل الصدور الرحيبه

ماتبا ألا نشاما بالنشاما تهلي
تذبح الكوم والكبش المربى تجيبه

ولا يبا الجار غير اللي ضلاله يضلي
ويحتسي للسبور ويحتسي للرقيبه

والمجالس تبي من كلمته ماتملي
ولاتزله سواليف الرجال الأديبه

والحجج مالها ألا العارف اللي يحلي
لا عطا فرض ماعاد الطليب لطليبه

والعنوه لها كلمه وماقف وحلي
يارجال الحسب كلن يدور نسيبه

المراجل عديده والجميل امتعلي
والرداء من مشا به بان للناس عيبه

غار أبا أوصيك يامنصور تاقف محلي
أن تعديت ولا ماقفي تعتنيبه

أنت من لابة تحما عقاب المتلي
كاملين الخصايل فعلهم نقتديبه

والله الكامل الدايم ولامطلبلي
عند غيره وغير الله مانلتجيبه

قالها اللي بعلم وتجربه يستدلي
ماتقدا براي فيه شكه وريبه

ياوجودي على وقت الطرب والتسلي
ماتحاما عليه ألا الظروف العصيبه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر