أنا ليا ثارت بصدري براكيني
عبيت جيبي من الممتاز طوالي

شلت الاواني ومسرى الليل يرضيني
نادالي الجدي للمرواح وومالي

في شاية الله نسيم البر يشفيني
مع بعد رمسي عن اهل القيل والقالي

ماني بدرويش ادور من يجريني
ادل درب ٍ يوسع صدري وبالي

واصبحت في مهمهن قفره يسليني
ماداج فيه المفطح شين الاعمالي

ياعاذلي بس كثر العذل يطنيني
اتبع هوايه ورايي وافهم بحالي

ان شح شنصي بمطنوح ٍ يخاويني
مشيت وحدي واقضي وقتي لحالي

مالي وبعض البشر يزعل ويوذيني
يزل في كملة مردودها غالي

واسمح لغلطة خويي ماني دويني
واشوم عن ردة الهزله ولا ابالي

واجعل بعدي العرب من بينه وبيني
يكفي اليا حال دونه لاهب اللالي

عندي ثقه وافتهم دنياي مع ديني
والبعد والصبر فيهن ضرب الامثالي

اسج بالبر دام الله معافيني
والعبد ماله عن اللي يكتب الوالي

ياموتري حنت سيورك تكفيني
مع عثعثن به غراز وخايعه خالي

ما احلى تهنفلك من ثالث اليا ثنيني
اليا تناولت عيطا راسها عالي

مثل تهنفل هنوف للمحبيني
ولع خطرها القوي زين التهنفالي

زاد الخطر والتحدي شقثت العيني
مع ركزة الجيد صار المر والحالي

شافت لها غايب ٍ ترجيه عاميني
مثل الاصيله تحدى ملحق التالي

ماتلتفت للمهبل والمساكيني
تبي سنافي غيور بكل الاحوالي

من نسل قوم ٍ نهار الحرب شرسيني
لهم براس الطويله كل منزالي

حلوين في حال والا حال مريني
عسر ٍ حماهم صعيب حبوس ورجالي

للجار والضيف ريف وقربهم زيني
ولاداج ببيوتهم سربوت وانذالي

على الشرف والرجول هحيل حرصيني
احرار لو يخسرون الروح والمالي


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر