بإسم عظيمآ كون الكون وأنشاه
عفوه عظيم ولاتحمل عذابه

الوحد اللي كل خلقه ترجاه
منزل هماليل المطر من سحابه

أجاب يونس بالبحر يوم ناداه
ومن بطن حوته طلعه وأعتنابه

وذنون من بلواه شافاه وأعفاه
وعقل علي يعقوب يوسف وجابه

قرّت عيونه فيه حبيبه وروياه
ونصرنبيه في بدر والصحابه

وبعده بديت بردخطٍ قريناه
نبي نجاوب كل جابه بجابه

قم يانديبي فوق جمسٍ نقيناه
مصرح له مايدقق إحسابه

عبارتين وكاملاتن مزاياه
أخرمديل أسليته فوق بابه

لياء أنطلق مع خايعن كن حلياه
صاروخ جوي وجهوه الرقابه

أشر إنبيره لين حددزواياه
ضحاه صافي مابجوه ضبابه

مشأ من رفحاء خالق الكون يقداه
فوقه شجاعآ كل دربٍ مشابه

شايب وشيبه من زمانه تحداه
جرب وجرب كل وقتن ومابه

الدرب واضح حط لينه بيمناه
بعد من الممتاز غلق شرابه

من الشمال بخط ناهس وعجناه
متوجهآ لأهل الوفاء والنجابه

خوالي اللي يوم دورالملاقاه
كم فرقوا بالكون لابه ولابه

يوم الشجاعه حقهم من تهقواه
يكره ملاقاهم وكلٍ يهابه

وكلٍ زعلهم في هاك الوقت يدراه
أهل كرم وأحرار وأسود غابه

وأهل شرف وأهل مواقف وأهل جاه
عزاز النفوس وللغداري أذيابه

وأعود للمندوب وأشرح سجاياه
حلحيل مارافق طيورالخيابه

صميدعي عزّام مابه مراواه
ولاخيّب اللي كلفه وأعتزابه

الظهر بمدرج وصل من تنصاه
عانآ لشغمومآ وصلني إكتابه

ناهس لياء وصله وقف ماتعداه
لياء جاله الناصي كلامه هلابه

ريف النشاما وريف ضيفه ومن جاه
يفداه من حاش الرداء في شبابه

خطه وصلني عالج القلب وأشقاه
معذور يالي تو قولي درابه

عقب البطا والياس جاني أمفاجاه
خط الرفيق اللي عزيزٍ جنابه

ردالوفاء راع الوفاء لاعدمناه
وغير الوفاء بيني وبينه قرابه

عالج خفوقي من صوابه وشافاه
خفوقي اللي مبطين به صوابه

ولولاء وصوله يأهل العرف لولاه
ان كان جرحي مايطيب ألتهابه

لاشك شاقتني إبيوتن أمصفاه
مثل الذهب صافي عن اللي يعابه

أزال عن فكري أهمومآ تدالاه
وأستانس المشغول ساعت قرابه

يامرحبأ من هاجسٍ زاد سلواه
وعداد من طاف الحرف واستعابه

وعداد من هلل وسبّح لمولاه
في مرسل المكتوب واللي لفابه

ياناهس المطلق جوابك فهمناه
بعد وصلنا وأمتلينا جوابه

خطك علي عيني وراسي رفعناه
يامن علي الطولات فازت أركابه

مشكور يالي فعلنا ماتناساه
ماينكرالمعروف كود القلابه

حيثك نجيب وتفهم العلم وأقصاه
صافي وفكرك يابن الاشراف نابه

ذكرت ميقافن قليلٍ من أطراه
وقته علينا مع رجاله غدابه

ولو كل مخلوقآ يبرق بعوجاه
ماصار بين القرابه إطلابه

وهذا زمانآ عم ناسه بلواه
فيه الهول يامسندي والغرابه

دورٍ بجوره خضّع الذيب للشاه
وأبوحقب والحر الاشقر تشابه

يامن علي المعروف تسبق مطاياه
من صدعني ماهبابي هبابه

وأرضٍ بها منّه لعلمك عزفناه
لوينقلب صوغ الذهب من ترابه

نفسي عزيزه منبر المجد تعلاه
ولاأخضع لغير اللي برجوا ثوابه

وأسمع سلمت وكل فايت تركناه
وجاك السلام وبلغه بالنيابه

وصلوا علي اللي بين الحق ماأخفاه
اللي عليه الرب نزل إكتابه


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر