حادث

لـ حمد بن فطيس، ، بواسطة غادة العلوي، في غير مُحدد

حادث - حمد بن فطيس

النوم جابه لي بدون اتعنّى
اثر السهر سبّة عدم وصل الاحباب

اكيد ماجت لي على ما اتمنّى
لو صك بابه فالمنام انفتح باب

اثر الجمال اليوسفي في وطنّا؟؟
ماني مصدّق قولة اشجاب لي جاب

الين شفته بالعيون...ايتثنّى
حتى وهو واقف..تثناية..الداب

الله ياذاك الذراع المحنّى
كفه ..وملح اكثرتمكياجه ..اخضاب

الزين طاغي فيه منّا ..ومنّا
مايستر الزينه عبايه وجلباب

فزيّت واعي ..كنّه يقول حنّا
وصحيت ..ماكمّل!! ..وذاك الرجا خاب

فرح..وحزين ..وخافقي ماتهنّى
من عقب صدفة (دعّمته).. حلمنا ذاب

صدفه مع باب المجمّع دخلنّا
في وقت واحد ماحسبنا له احساب

حادث..مهو يشبه حوادث زمّنّا
راح وترك في ماقفه ريح الاطياب

داخل وهو خارج ..ولي ماتسنّى
وقفه..لان الباب كهرب وسّحاب

كررّت مدخالي بدون اتأنّى
وعيّت تكرر دعمته لي على الباب

© 2024 - موقع الشعر