رحلة قنص

ياالله ياللي للسحايب تنشّي
محيي هشيم ٍ .. مات وعروقه اعطاش

يامن لعبده في حياته يمشّي
لولاك .. ماكاين ترعرع ولا عاش

عن من يحشّ العرض .. بالهرج حشّي
تعيضني .. سجّة قفر تبرد الجاش

رحلة قنص .. ماهي برحلة تمشّي
ينسي تعبها كل مسرى ومغباش

اللي كسلها في العروق امتفشّي
تلوم عشاق البراري .. على ماش

عن شوف تلفازي وموجات دشّي
يكفي النظر فوق الصحاري والاحراش

لوازم المقناص هي كل قشّي
وبكر الحرار اللي ينومس الى شاش

يلحق ولو هو يوم هد امتعشّي
ويفري ملاوين الدواغر الى ناش

ويدق متن اللي لراسه يخشّي
الى غدى ريشه على متنه خياش

وللي .. بكفه .. لا عزلته يطشّي
مافيه لا صيحه ولاهو ابكوّاش

كن عاتقه .. عاتق حنيش ٍ.. يهشّي
يهاوزه راعي العصا .. عقب ماهاش

ابش به ..وهو لشوفي يبشّي
ودآر .. يامال ٍ بمثله دفع كاش

اقنص معه (وظنون )فكري توشّي
وافز .. واثم الظن يبلشني ابلاش

رشيت جال القلب.. ما فاد رشّي!!
ابغيه يركد غير لامن هدى ..طاش

وغشيت هوجاسي ..ولافاد غشّي
يوم انتحى بي للظبي ذاك .. منداش

اللي لسمر مجدلاته .. ينشّي
ظبي ٍ جفول ٍ لا نصاني ولا انحاش

ياظبية ٍ .. لو عرّضت قلت وشّي
على اسمها لامر ما اسلّط .. افلاش

مالوم مصفوف الشعر لو يكشّي
الطايره طاحت بطلقات منقاش

عظمي هشاش .. ومنطق العذب هشّي
باجي على طور الهدف وابسط فراش