الشبكة مشغوله - حمد بن فطيس

الى متى والشبكه مشغوله
وانا على اعصابي ومشغل بالي

لا ارتحت في ممسى ولا قيلوله
ابعدت عن داره انا وارسالي

كل العذار اللي تجي مقبوله
ما راح ..راح وما بقى يبقى لي

هذاك الاول يوم هي مجهوله
من قبل يكشف لي هواها فالي

كل المسايل عندها محلوله
وريالها في البورصه.. بريالي

لاجيت اوصّفها.. قزازة كووله
تزعل من التوصيف صفر دلالي

لاهو بمن قصره ولا من طوله
بس التعزّل قصّره ثم طالي

كنّّه يناظر لا مشى برجوله
والى جلس ينظر لشي ٍعالي

وان شفت خصّلات الشعر مفلوله
يزيد من بشت الغلا غربالي

ياما حلا لونه تحت مجدوله
يشخل بياضه كنّّه الشلاّلي

اخذت معها وقفتين وجوله
انا وهي وظلالها وظلالي

تمد وتكيل الغلا بالتوله
ما الوم انا الغالي يشح بغالي

ان جيت اوصّفها تقول..اتقوله
واهز راسي لا يطول اجدالي

يابنت كل احروفك المعسوله
لي ساعتك في مسمعي تجتالي

اقل ما ينقال لك مجموله
من راسك لقدّك لرجلك حالي

هذا الكلام اكرره واقوله
وانا معك والا وانا بلحالي

مكانتك في خافقي معزوله
وان كان رحتي ذا مكانك خالي

يا اهل النوايا السود يامهبوله
اقول خلوني انا وهبالي

ما بالتفت للهرجه المنقوله
مادام راس المال هذا مالي

لاشك بسم الله عليه وحوله
اتذكره واعتب على جوالي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر