يا محمد

ماتوصى يا محمد في اخوانك
دام جنحان العقاب اللي تشلّه

هم عضودك لا تهاون بك زمانك
يثبتون وغيرهم يخلي محلّه

من تهاون في مقام اخوك هانك
لو يعزك من يحقر اخوك ذله

ومن يخون ابهم على ماقيل خانك
دونهم لا تجعل الاقصين أخلّه

حاجتك منهم تجيك الى مكانك
كنهم لك ظل ظلعان ٍ مطله

انت بالنسبه لهم ياعظم شانك
انت مثل حجاب بيت وهم (لخلّه)

ليّن الجانب لهم والجم احصانك
الجفا كثره على الصاحب ممله

ومدهم بالعون كان الله عانك
غيث غيرك شاربك ماهو يبله

واهدهم للدين يوم الدين زانك
ومن جهل منهم طريق الخير دلّه

ليّن الجانب وعطهم من حنانك
واستمع منهم وما يلهيك خله

انت عقلك بك وفي راسك عنانك
قد صقرتك لين صدت الصيد كله

شايف ٍ لطفك وتكسيني حسانك
ماتغيّرك الليالي والاهلّه

بارك الله بك وفي باقي اخوانك
كلكم من ساسكم سله ودله