سحر الخجوله

زود على سحر الملامح خجوله
ولاجات تحكى أذعنت كل الأسماع

ماهى تصنع هرجها اللى تقوله
لكن كذا غصبن على الناس تنصاع

هى ملفته ولاتجيك بسهوله
من دونها سيف شطيرن وقطاع

لها جديلن ليل أرخى سدوله
وياكم سارى ليل فى ليلها ضاع

تبى تشوف الزين على أصوله
ناظر بها لامن حكت وأنت سماع

فى وجهها رقة جمال الطفوله
وفى عيونها جيش ومتاهات وأقلاع

والثلج حامى النار والنار حوله
وتشوف وهج النار والثلج ماماع

رويان وفى بعض المواقع نحوله
واضح وهى بالبشت ومن تحته قناع

لامن مشت قلب المعنى تزوله
خطواتها لاقستها قوس بذراع

أجمل مره فى خاطرى ذا الخجوله
زين العذارا والحلا جنبها ضاع