يا غايبة !

الروح من فرقا المواليف ذايبه
والقلب متفطّر لفرقا حبايبه

من عقب ما راحت واقفت ظعونها
والعين همّال الدمع في سكايبه

أخفّي الدمعات وأكتم عبايري
وهموم فرقاها على الصدر نايبة

وأذكر ليال الحب بيني وبينها
يوم الصبا هبت بشوق ٍ هبايبه

يوم انتلاقا وتضمر أشواق قلبها
مدري حياء ولا من الحب هايبة

وابديت انا مكنون ما في خواطري
ونار الوله حرّق خفوقي لهايبه

يا بنت نادت لك روايع مشاعري
وأصبحت أنا شاعر وزينك سبايبه

وذكرت حزة جيتك بعد غيبتك
لشوفك الخافق يغني (يا غايبة) !!

راحت هاك الأيام والشعر سلوتي
و( . . . . . ) لقلب المعنّى طبايبه !

ياشين حظ ٍ دنيتي به تكدرت
حظ ٍ ردي دايم توالى مصايبه!!

قولوا لأهلها لا خذتها منيّته:
قلبي القبْر وضلوع صدري نصايبه

ثم بلّغوا ( . . . . . ) عقب ما افترقنا
النفس عن حب الغنادير طايبة!