يابو سعـد عينـت ماقالـه اسميـر - عايش مرزوق الجويسري

يابو سعد عينت ماقاله اسمير
عشب وربيع وافقت قاف ماقال

شفت الزبيدي باختلاط النواوير
تجذب زباريخه من القاع كدشال

أموافقٍ نجمه سحابٍ مزابير
ياقف جاه من الهماليل علاّل

لينه غدى لحفاف عشبه دواوير
من كثر خير الله نواويره أشكال

يازين ممشاَ فيه مع خوّة الطير
في ساعةٍ يرمي بهن بالخلا الفال

ياشافهن وانتل من دسّه السير
وخْرمْ وشاف مصدوعٍ باالشفا زال

يبغى العشا لحاق برق الدواغير
جثل المناكب لابرق الريش قتال

أبيض خرش حمّار عينه كما الكير
عوق الخريش وللمخامير غربال

شوفه وشوفتهن تزيل التفاكير
يطرب لهن قلبٍ لهن فيه منزال

شوف الفياض وشوف خِلفٍ مصاغير
شوف الفياح اللي له أتلال وسهال

هو منوتي ولا ترى العمر تقزير
بو طال وقته مع لياليه ينزال

لابد من عقب الصعود المحادير
لابد من عقب الفضا بيت الأهوال

بيتٍ عسانا فيه يكتب لنا الخير
يقفوا جماعتنا وواجهت الأعمال

في ساعةٍ ماينفعن المعاذير
قدم الكريم املط بلا وزار ونعال

يالله عفوك عند ذيك التقارير
في ساعةٍ عما فعلناه ننسال

في ماقفن مافيه مهله ولا تأخير
قدام من يعلم خفيات الاحوال

يالله عفوك ياولّي المقادير
يامرجعن للقاع من عقب الامحال

أرجيك عفّوك عند شوف الزمهرير
في ساعةٍ ماينفع الابن والمال

هذا الصحيح ولا يبي الصج تفسير
أبدنياً تودي الأخره دق وجلال

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر