بكره تجيني - فيصل بن عويمر

لاتنصدم لاقلت لك روح مابيك
دامك تجازي من يحبك بالاحزان

مشيت درب الثقل ربي يجازيك
والكبّر مايسكن مع الحب وجدان !!

الظاهر انك ماتذكرت ماضيك ؟؟
لولاي يابن الناس تنذل وتنهان ..!!

رح للذي بالصوت يصرخ يناديك
قله تركته بين ضيقه وحرمان

على كثر ماحتجت شفني حواليك
يوم ان غيري ساعة الضيق مابان

كنت القريب اللي يحبك ويغليك
واجيك من قبل المواعيد ولهان

كان الفرح في دنيتي يوم الاقيك
ساعة غلا واشواق من بين خلان

واليوم عفتك يوم شانت مباديك
والكبّر هدّم مابنيته ولا صان

تدري وش اللي يذبح القلب ؟؟ طاريك
وكنت تحلف مايسكن بقلبك إنسان ..!!

شمعة غلا طفيتها بين اياديك
والحب في قلبك توفى ولا كان

خذها وعد والوقت باكر يوريك
خسرت حب اللي مع الوقت ماخان

اثقل مدام الوقت صافي مسليك
بكره تجيني خاضع الراس ندمان ..!!

© 2024 - موقع الشعر