شبيه الريم - كديميس السيحاني

ليه الحيا دام الامر بالاسم والدنيا زوال
وين الميانه ياشبيه الريم والطرس انطوى

ياليل لا ياصبح والا اقول ياوقت الزوال
ان كان دربي طال والطرقة, ترى الحال انطوى

اعيش غربه في زمان الصمت واحلامي خَيَال
حتى مع احلام الزمن يصغر خيالي في الهوى

احلم بوصلي للثرياء فوق غرّات الخِيال
واعيش معها في مدار الكون بأنفاس الهوى

وفي العلم يابعد الثرياء ماحصل معها اتصال
لو التناجي بيننا قصة بلا راوي روى

ولو جيت احاول لإستماع الصوت في علم إتصال
اشوف ميرادي بعيد وصدر ضامي ما روى

البن يحمس في المحاميس ويقدّم في الدلال
مقياس كيف لزعفران وهيل للراس الدوى

ياقايدة للغيد زود الجرح من زود الدلال
والنبض في صدري من سهوم الموده لك دوى

اما اسعفي مجروح روح الحال ناحل ماش حال
بالوصل عن قرب وظلام الليل من نورك ضوى

ادني وخلي كل بعد وكل ظرفً قبل حال
ينزاح من دون الحدود , ليا بغى وصلك ضوى

قلبي تجرّه يمك حبال السواني والمحال
لو قلت عل بصمت ما قلت إلك يالغالي لوى

وإن كان للضامي تقول اليوم ميراده محال
مانيب منهو ساعة الشدات لذراعك لوى

© 2024 - موقع الشعر