يالله ياواحد وخير معبودي - نياف بن نمّاس السميري

يالله ياواحد وخير معبودي
يامرسيٍ صم الجبال بوتدها

يارافعٍ سبعٍ بليا عمودي
يارب محص الكائنات وعددها

تجعل لنا عن صلو نارٍ وقودي
مزبن اليا جا الروح باكر وعدها

وخلاف ذا ياطيبين الجدودي
الاوله والثانيه وش بعدها

صبرت لين الصبر طاف الحدودي
مع درب خلان الرخا من نكدها

ياجعل خلان الرخا ماتعودي
ويالله تبعد عن بلدنا بلدها

اهل القلوب اللي من الغيض سودي
وان عاهدت ماتلتزم في عهدها

لو كان معها ماضيٍ لك عهودي
تخلف وتحذف وعدها مع عهدها

وبالحكي تشتال الجبل والنفودي
وعند اللوازم مايشري زندها

ضعاف العقول مبيحين السدودي
اللي تجيب العلم محدٍ نشدها

ولو قال انا زومان مالي حدودي
سوالفه مثل البحور وزبدها

وان كان شافوا وسط جيبك نقودي
تشوف بارقها وتسمع رعدها

وان غبت قالوا رجل مالٍ يجودي
وان جيت قالو كل قاله فهدها

وان كان مالك قل قالوا يهودي
والا ضعيف وطيّباتك جحدها

ولو كل غابه تحتميها الاسودي
كانٍ من يحسن شهاده شهدها

والحي واللي تحت صم اللحودي
في حكم محص الكائنات وعددها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر