سر ياقلم واكتب الكلمه ونقدها - نياف بن نمّاس السميري

سر ياقلم واكتب الكلمه ونقدها
من هيض بالٍ سوات السكر الحالي

اوجد لنا الحبر والقيفان نوجدها
واكتب وانا اعطيك مايطري على بالي

من كوكبٍ ماتحير في توافدها
ولا هوب يصرف جناه السوق بريالي

نفسي تحب الوفا وانا معودها
ولا ني بخاتل ولا حبيت ختالي

لكن بعض العرب تخلف تقيدها
وتجيك فزعاتها رجلي وخيالي

واحس في خاطري نارٍ تواقدها
ماكنت اصدق بها لوكان يحكالي

لكن انا ماسكٍ صبري واجاحدها
واجامل الناس حتى بيّدت حالي

يالله عسى شجرةٍ قلة فوايدها
وقت القو ايل بليا فيّ وظلالي

عسى طيور ابرهه ترسل وتنقدها
وان كان غلطان ياقضاب معدالي

وان زان لي حجةٍ للناس اوردها
والثوب كيف البسه من غير تفصالي

واصحابنا في الرخا مكثر تشددها
وش عاد لو كان وقتٍ مستوي مالي

تغلب طبيعه تطبعها عوايدها
ياجعل بعض الطبايع مالها والي

اللي تصح الاوادم من مراقدها
وتطب سوق الرخيص وتترك الغالي

والنار بين اللحم والدم توقدها
وتزيد نار الجحيم وتشعل اشعالي

وان جيت ودك جحيم النار تخمدها
يقول انا اعذرت في عمي وفي خالي

هو مادرى اني وجيه الناس ماعبدها
لي ملةٍ ماتغير والقمر عالي

غفلت ياذيب والعضد متوسدها
وانا احسب انك فطين القلب تصحالي

اغضبت لك ناس والا ناس مسعدها
وانا من الباب الاول جايزٍ حالي

والعصبه اللي مقردها تفرقها
في الارض ياجعل مايبقي لها تالي

ماقلت لي كلمةٍ غير متعمّدها
واصل الخساره سببها روس الاموالي

واعرف دروب الذيابه من ترددها
في كنةٍ القيض حاديها اشهب الالي

في هضبةٍ تتعب الطرقي مواردها
لوكان له حيلةٍ ماعاد يحتالي

ولحدٍ يسوق السفينه غير سايقها
واليا غلط في البحر تصفق على الجالي

والناس واجد وانا وشلون اعددها
وامة محمد تقسم خمسة اشكالي

كلٍ على ملةٍ يِتعب مجاهدها
مكتوبةٍ في كتابٍ مايورالي

واللقمه اللي على كيفك تبرّدها
ان جات في الارض قال ابليس تفكالي

اشره على قوم والا قوم نيّدها
لونّها مخطيه ماهي على بالي

واسعى مع الناس واكمامي ماعقدها
قبل اكمل الحج كيف اطوف الاميالي

ولا همني بارق العالم وراعدها
مالد له عارفٍ جو السما خالي

والصاحب اللي علوم الحكي يسردها
وان صادفه قال وصلك ماتهيالي

ويميّل عذوق صفرٍ في جرايدها
بالكذب كنه من السفاح يكتالي

ويقول انا معك وسيوفه يجردها
خله عشاً للطيور وزهر الاذيالي

واللي تكحل عيونك من مراودها
وتضحك بسن الغضب وتغلق التالي

واهيلتي غرّة العالم تصيدها
تبا توكل بليا قيد وعقالي

في كل يومٍ على بالي تجددها
ماعاد ناقص عليّه حكي وجدالي

واقبل خطا قوم والا قوم اعاندها
واعرف مع الناس مظهاري ومدخالي

وادرِ ان روح البنادم لو تفقدها
عن الخطا ماعصم من ماض الاجيالي

تفوت من يدك لوّّّنك مجودها
وتصير مابين شماتٍ وعذالي

والارض من كبرها وشلون احددها
والناس غاية رضاها ماتهيالي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر