واقلبي اللي مع الايام ماقـــساه - نياف بن نمّاس السميري

واقلبي اللي مع الايام ماقساه
ماضاع من هم عن مهموم يشتاله

قلبٍ مع الوقت قاسي لو تحدّاه
يوم ايتهيا ويوم ماتهياله

كنه على نار تنوره وتصلاه
وان صد تحداه رجليه وخياله

قلبي تولع بخلانه ومرباه
ماينعذل والعيون القشر تبراله

يخيل برق الحيا اللي زان مسراه
يصعب على الطرقي العجلان ميصاله

يأللي تبا نجد خذ لك مني وصاه
خفيفة الوزن مني ظرف ورساله

واكسب جماله وفضلك كيف نجزاه
من واحد زادت ضروفه مع اشغاله

وده لخل ترانا مانسيناه
هرجه على البال وهروجي على باله

واسمه على الظرف كان الاسم تقراه
ان جاك والا عطه من يبخص احواله

يامى تمنيت من شوفه ولاماه
واسكت واجامل وكني في العرب داله

ولو المناوي تجيب اللي تمناه
ماكنت انا والمناوي حالتي حاله

يامى سهرت الليالي واترجاه
كما ترجي كبير السن لعياله

حاسبت صاحبك يالصاحب بدنياه
قصدك تغلي او قصدك من اعماله

يامتلف الروح حالي كيف تبراه
عذبتني ياهوى بالي وغرباله

الخد فيه العجب واللبس تزهاه
والعنق فيه الذهب والعين قتاله

واظن زرق الحمام يقلد اخطاه
وشقر الجدايل على الامتان مياله

ويذهل عقول الملا في الارض ممشاه
اليا دق خصره وقام يهز خلخاله

والصبر يامورد الخدين ما اقواه
مانقدر الصبر كان الصبر تقواله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر