ذنب مسلم - نعير بن شلوان

اه من جرحٍ بقلبي مالقى الدكتور طبه
كون كلمه قالها الدكتور قلبي مانساها

كلمة الدكتور شف النفس جا للجرح سبه
والحقيقه ماخفاني واحدٍ حالي سباها

قلت يادكتور صادق شب نار الجوف شبه
الغريب اللي وصوفه غاية النفس ومناها

كن عنقه عنق ريمٍ راتعٍ له وسط خبه
سامعٍ له رميةٍ ماشاف زول اللي رماها

غصن موزٍ كل ماذعذع هوى الغربي لعبّه
ايتثنى من ليانه واشقى عيني شقاها

جيت يمه وابتعد عني ولا حرفٍ نطق به
قلت وقف ونظر اللي نظرة الرحمه رجاها

ولتفت لي بنظرةٍ مابعدها كون المسبه
ياوجودي يوم قفى والرجل يسحب خطاها

وجد سباح البحر لاقل حيله وسط غبه
وصاح له صيحه ولا حوله بشر تسمع صداها

اتوجد يوم قفى واحدٍ ماخاف ربه
كاسبٍ له ذنب مسلم علته يصعب دواها

يقطع الله حب من لايعرفك ياشين حبه
مثل نارٍ مايحس بها ياكود اللي وطاها

© 2024 - موقع الشعر