وا قلبي

وا قلبي اللي كل يومٍ وأنا أهاه
ميّس من اللي حال من دونه الياس

لاجيت أبنهى القلب عن غاية مناه
واجوز من اللي وقفوا دونه الناس

غصبٍ علي أبكي إلا حل طرياه
تبكي عيوني بدمعها تصير غطاس

حسبي على اللي سهّر الطرف وأبكاه
لجله سبحت بحور همٍ وسواس

ما شفت أنافي البيض مثله وحلياه
خلٍ جميل ولا لقينا له أجناس

محلا وصوفه يوم أحلّيه محلاه
كتفٍ وردف وعنق ونهود جلاّس

وخدٍ كماالبرّاق حمرٍ شفاياه
وحجان سود وخشم وعيون نعاس

لامن نظرت أوصاف خلّي أقول آه
واحمس كبدي حمس بنٍ بمحماس

سبان ربٍ خالق الزين سوّاه
منساه أنا لو يطلع الشيب بالراس

يطري لمن شفت القمر كنه إيّاه
يطري علي ويزورني كل هوجاس

نور القمر نصف الشهر جاب ذكراه
ذكراً تخلّي صاحي العقل ينحاس

آخر ماأقول يا ناس ما والله أنساه
قلبي صخيفٍ له رهيفٍ وقرطاس

عزيل حالي من هوى الترف عزّاه
مكّن بي العلّه وسيس لها ساس

ومن لامني ياالله تصيبه بدنياه
من لامني عساه كدّه بالأفلاس