الالفيه - نعير بن شلوان

الفٍ اولف ياعلي ماطرالي طواريٍ اسبابها حب غايلي
والباء برى حالي ويابري حالي وعلية حالي ياعلي صار محرورق

والتاء تراني مبطيٍ مالقيتة الصاحب اللي لو نسى مانسيتة
والثاء ثمان سنين ما عاد ريتة بنخاك تكفى جعل تسلم من العوق

والجيم جيب العلم ياخوك تكفى تكفى ترى شرواك لا قام كفى
والحاء حياتي في خطر يومه اقفى والصبر زين وكل مطرود ملحوق

والخاء خبرتة يذبح اللي يشوفه معزلٍ عودة نوابي ردوفة
والداء دواء للجرح كامل وصوفة ادعج غنج مملوح والعنق منتوق

والذاء ذكي نال الشهادة بتقدير وايضاء حسين اخلاق بين الغنادير
والراء ربيع القلب كلة نواوير لامن طرى قلبي على ذكرة يتوق

والزاء زهاه العقد والتاج فوقة وخدة ذبحني يوم تكشف بروقة
والسين سوق البيض ماهو بسوقة ماكل مخلوقٍ يعوض بمخلوق

والشين شّف لي وغاية مرادي ماهمني لو قيل يانعير غادي
والصاد صوبني صوابٍ ٍوكادي واصيح له يازين برفوق برفوق

والضاد ضلع طويق لو حال دونه لا روح له والحال فدوة عيونة
والطاء طعوني كلبوها طعونه تحت الضلوع انقص بالقلب معلوق

والظاء ظلام الليل يشبه جديله يسحر سواده كل عينٍ تخيله
والعين عيا القلب يرضى بديلة غاية مناي وكل واحد وله ذوق

والغين غلفت لحبيبي رساله كتبت يقراها حبيبي لحاله
والفاء فديته كل ماجاء مجالة علية دمعي غرق الخد من فوق

والقاف قم ياللي معاك الرسايل هذي عناوينه وكل الدلايل
والكاف كلفتك ياراع الجمايل رح للبريد وحط خطي بصندوق

واللام ليته لاقرى الخط جاني واعيش انا وياه والعمر فاني
والميم من فرقاه اعاني واعاني هم لحقني مالحق كل معشوق

والنون نارة في ضلوعي توهجم ليته قريبٍ لي وليته ولد عم
والها هجوس الصدر لاجله ترزم صوت الصدر مثل الرعد لا طرى الشوق

والواو وينه من على البيض به فرق اخذ جمال البيض والسمر والزرق
والياء يكفي من هل الغرب والشرق وعلية حالي ياعلي صار محروق

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر