قسمه ونصيب

لـ نوال سالم، ، بواسطة منيره العبسي، في غير مُحدد

قسمه ونصيب - نوال سالم

ليش تتركني أعاني وانت لجروحي دواي
كم سألتك لو تحبني يا حبيبي وما تجيب

قلت لي كلمة أحبك وانتِ لعيوني ضواي
قلتها لي وقلبي خايف بعد هالكلمه تغيب

صرت اخاف من الليالي تبعد الحب عن سماي
تعرف إني من عرفتك الحزن ما له نصيب

كيف تتركني ليالي وانت تدري يا هواي
أنتظر وقت الملاقى والعمر عندك يطيب

لو تعاقبني بغيابك بسألك شنهو خطاي
بسألك ليش اتغلى وانت أقرب م القريب

لك هديت القلب وعمري وما انتظر منك جزاي
واجمل اسراري خفيته عن قريب وعن غريب

ليش تتركني أنادي ويرجع لسمعي صداي
واصدق اشواقي تنادي وين اشوفك يالحبيب

خل عيونك في عيوني واعترف لي اشقد غلاي
عانق حروف الحقيقه يا تصيب ويا تخيب

قلت لك لا تحتويني خلني بعالم شقاي
لا تعلمني أحبك والهوى ما له طبيب

قلت خليني أحبك واكتبي حروفك معاي
واكتبيني مع حروفك واوصفيني بالحبيب

ما يفيد اندم واعاتب والهوى ما هو بهواي
من يحب صعب يتناسى وما جرا قسمه ونصيب

الله كاتب لي أحبك ويبتدي فرحي وشقاي
بيدي خطّيت النهايه لابتدت شمسك تغيب

من كثر حبي لحبك بترك العالم وراي
واكتبك يا كل عمري أول وآخر حبيب

© 2022 - موقع الشعر