ثمان سنين - مهند العشيش الخالدي

اخطيت يوم اني نزحت وتغربت
تركت ربعي واحسب انها شجاعه !

تركتهم بالجوف عنهم تجنبت
بالدين حتى ماتجوز القطاعه !!

ثمان سنين(ن) مغترب ماتسنعت
كل يوم اعدّه بالدقايق وساعه

يابوي من بعدك تراني تغربلت
والشيب في راسك قهرني وداعه

عيّوا علي لاروح منهم توحشت !
وانا على خبرك قليل الشفاعه !!

بين السما والارض شفني تعلقت
لاواهني اللي بقلبه قناعه !!

يااااكثر غلطاتي ويااااكثر ماصبت
ويااااكثر ماحظي صفعني ذراعه !

سلبيّة الموقف عليها وطنشت
لاحاشني تجريح بعض الجماعه !

جرح(ن) بقلبي منْه ياما تألمت
متحيّر بحبل الوصل وانقطاعه

في سلمنا ماني حشى به تهاونت
لاتصدقون مروجين الاشاعه

الشاهد اني بهالبلد ماتأقلمت
بالعاصمه راسي يزود بصداعه

عقارب الاسبوع من سبت لِ سبت
طال انتظاري بالحشا والتياعه

وش هو به اطلع لاجلست وتصبرت ؟
وش هَو لي اقعد عايش(ن) بالفضاعه

وش هو لي اشقى دامني ماتصورت
نفسي وانا اللي مازهاني لفاعه !!

لاواعذابي وين مارحت غربت
خيي اثاريه الشقا من الرضاعه !

يابوي جيتك قاصد الدار لاهنت
يابوي جيتك كلي سمع(ن) وطاعه !!

© 2024 - موقع الشعر